Ma’u ‘o ha Pa’anga 50 Loi

Kuo ma‘u pea mo fakapapau‘i ‘e he Pangikë Pule Fakafonua ‘o Tongá ha lau‘i pa’anga loi ‘i he pa’anga ‘e $50 fo’ou (‘Imisi ‘o ‘Ene ‘Afio Tupou VI). ‘Oku hoha’a ai ‘a e Pangikē Pule´ na’a kuo lahi e $50 loi kuo tufaki holo.

Ko e ngaahi lau‘i pa‘anga ko ‘eni´ ‘oku ‘ikai ke hā ai ‘a e ngaahi faka‘ilonga fakapulipuli maheni, ‘a ia ‘oku totonu ke ma‘u ‘i he lau‘i pa‘anga $50, ‘o hangē ko ‘eni:

1. Ke hā ‘a e langi ‘o ‘Ene ‘Afio´ ‘i he maaka hinehina fuopotopoto (watermark) ‘i he tafa‘aki to’ohema ‘o e lau‘i pa‘anga kapau ‘e puke ki ‘olunga ki he maama;
2. Kuo pau ke hā ‘i he fofonga ‘o e lau’i pa’anga ha filo siliva ngingila (security thread) ‘a ia ‘oku te malava ke vakai mei he tafa’aki ‘e taha ki he tafa’aki ‘e taha, pea ‘i he tu’a ‘o e lau’i pa’anga, ‘oku hā mahino ange ai fakataha pea mo e ‘imisi ‘o e metali fakafonua;

‘Oku ‘oatu ai ‘a e fakatokanga mamafa ko ‘eni´ mo e kole ki he kakai ‘o e fonua´ ke mou vakai‘i lelei ‘a e lau‘i pa‘anga kotoa pē tautefito ki he pa’anga ‘e $50 fo’ou na’a ko ha pa’anga loi, kimu’a pea ke toki tali ke ngāue’aki, he ko e pa’anga loi kotoa pē, ‘oku ‘ikai hano mahu’inga pea he’ikai ke tali ia ‘e ha Pangikē pē ko e Pangikē Pule Fakafonua ‘o Tonga.

Fakapapau’i ‘oku ‘ikai ko ha pa’anga loi ‘oku ke ma’u he ‘oku hange pe ‘a e pa’anga loi ha koloa kaiha’a pea ‘e lava pe ke ke mo’ua ai.

‘Oku kole atu ai heni ki he kakai ‘o e fonua, ke mou kātaki ‘o lipooti hangatonu ha ngaahi pa’anga loi te mou ma’u ki he Potungaue Polisi ‘o Tonga´ ke fakapapau’i mo fai foki ha ngaue ki ai. ‘Oku mau fakatokanga atu heni kiate kimoutolu ‘oku mou paaki mo tufaki ‘a e ngaahi lau’i pa’anga loi ko ‘eni, ke mou mea’i ko e hia mamafa ‘eni ‘i he lao hotau Fonua, ‘o hange ko ia ‘oku tu’utu’uni ‘e he kupu 59 moe 61 ‘o e Lao ki he Ngaahi Hia CAP 18 pea mo e kupu 29 ‘o e Lao Fakatonutonu ki he Pangikē Pule 2014.


Ki ha ngaahi fakaikiiki, kātaki fakafetu’utaki mai ki he:

Pangikē Pule Fakafonua ‘o Tonga
Fika Telefoni: (676) 24057 | Fax: (676) 24201
Meili 'Elekitulonika: This email address is being protected from spambots. You need JavaScript enabled to view it.

Ma'u atu ha'o tatau 'o e fanongonongo ni 'i he Lea Faka-Tonga

Archive

 

Banknotes

Career

tra

You are here: Home News Public Notice Ma’u ‘o ha Pa’anga 50 Loi